Sot në Kryeministri është firmosur marrëveshja për blerjen e flotës së dronëve “Bayraktar”, mes Shqipërisë dhe Turqisë.
Lajmi është bërë i ditur nga Edi Rama, disa ditë pasi kreu i qeverisë shqiptare zhvilloi një takim “kokë më kokë” me presidentin e Turqisë, Recep Tajip Erdogan. Sipas tij, kompania turke do të stërvisë 30 persona për dronët, ndërsa shtoi se qendra e kontrollit do të vendoset në bazën e NATO-së në Kuçovë.
“Krenar që jemi të rreshtuar në aleancën më të madhe ushtarake, NATO-s dhe në të njëjtën kohë të jemi të rreshtuar në një partneritet strategjik mes nesh dhe Turqisë. Me këtë marrëveshje nuk po sjellim këtu në Shqipëri teknologjinë më të mirë të lartë në këtë fushë, por kështu do sjellim në Shqipëri një fushë të re njohurish dhe është shumë mirë që marrëveshja nuk është vetëm për të blerë dronët por ka të bëjë edhe me ndërtimin e një ure mes FA tona dhe kompanisë bajraktar që do kujdeset për trajnimin e njerëzve, më shumë se 30 persona që do përzgjidhen me shumë kujdes me ndihëm e kompanisë bajraktar që do vihen në një trajnim dhe do përgatiten për të marrë funksionin e qendrës së kontrollit që do jetë objekt i teknologjisë më të lartë në bazën ajrore të Kuçovës,”- tha Rama ndër të tjera në fjalën e tij.
Në fjalën e tij të gjatë, Rama kujtoi se kishte shkuar dëshmitar në dasmën e vëllait të drejtorit ekzekutiv të kompanisë “Bayraktar”, duke kujtuar pjesëmarrjen në dasmën e vajzës së presidentit turk. Rama ka ecur në të njëjtin hap si “miku” i tij serb Aleksandër Vuçiç i cili gjithashtu ka nënshkruar marrëveshje me Turqinë për të blerë dronë Bayraktar. Ai tha se pjesë e marrëveshjes së firmosur janë tre dronë, që për Ramën do të jenë shumë të dobishëm për sigurinë e Shqipërisë.
Rama: “Shumë të dashur miq nga Turqia. Do doja ta nisja duke thënë se unë kam qenë vetëm njëherë dëshmitar në dasmë në jetën time. Martesa ku kam qenë dëshmitar ka qenë martesa e shpikësit të Bayraktar. Shpresoj që si dëshmitar së paku nuk kam sjellë mungesë fati, shpresoj kam sjell fat. Dhëndri po i sjell ca fat ushtrisë sonë dhe vendit tonë. Jam shumë i lumtur, por ndërkohë dua t’ia nis andej nga duhet nisur, për të falenderuar presidentin Erdogan, i cili ka qenë thelbësor në këtë process. Kur vjen fjala për mjetet pa pilotë, nuk ka të bëjë vetëm me të pasurit e parave, por ka të bëjë dhe me faktin që të jesh i aftë që të kalosh radhë e të shtysh në radhë, sepse radha është shumë e gjatë sepse nga ana tjetër është fakti i të qenurit në anën e duhur. Ne jemi krenarë që bashkë me Turqinë jemi në krahun e duhur, të rreshtuar në bashkësinë euroatlantike të NATO-s. Sot është një ditë shumë e mirë për marrëdhënien tonë, për Forcat e Armatosura dhe ministritë tona të mbrojtjes”
Çfarë është droni Bayraktar?
Listës së gjatë të klientëve për dronët turq, Bayraktar i është shtuar edhe Serbia. Në fillim të shtatorit, presidenti i Serbisë, Aleksandër Vuçic deklaroi arritjen e një marrëveshjeje me Turqinë për të blerë dronë Bayraktar, të cilët tashmë kërkohen nga të gjithë për shkak të efikasitetit të treguar në luftën në Ukrainë.
Droni TB2 (Bayraktar) është zhvilluar në Turqi nga Selcuk Bayraktar, i diplomuar në Institutin e Teknologjisë të Masaçusetsit. Bayraktar TB2 mund të qëndrojë në qiell deri në 27 orë dhe kjo mundësohet nga një motor i thjeshtë me helikë dhe po ashtu mund të fluturojë deri në 150 kilometra nga baza e tij.
Kjo fluturake, po ashtu, mund të pajisjet me katër raketa të llojit të “mikro municioneve të mençura”, që janë mjaft të sakta për të shkatërruar automjete të blinduara nga disa kilometra distancë.
