“Nëse do të përgjigjem, e fitoi SHBA-ja, Yuri Kim”.
Kështu është përgjigjur deputeti i Partisë Demokratike, Ervin Salianji kur është pyetur lidhur me përplasjen e javëve të fundit midis ambasadores Amerikane Yuri Kim dhe kryeministrit Edi Rama lidhur me garën për kreun e ri të SPAK, që në fund u fitua nga Altin Dumani me 5 vota pro në KLP.
Salianji thekson se pavarësisht se fitoi diplomatja amerikane, ndërhyrja e SHBA-së në reformën në drejtësi, tregon se ajo nuk po funksionon siç duhet dhe duket se është herë pas here në rrezik për të rënë në dorë të qeverisë që synon të marrë “peng” institucionet e reja të drejtësisë.
“Ishte një betejë emrash. Ishte një model i krijuar, Edi Rama ka kujdes për reformën në drejtësi. Thelbi i kësaj reforme është shkëputja e ndikimit të politikës nga institucionet e drejtësisë. Në strukturë, jemi përpara një sistemi drejtësie të pavarur. Fakt që u detyruan të ndërhyjnë amerikanët, dhe që kjo reformë ka nevojë për ndihmën e SHBA-së për të funksionuar, tregojnë që nuk jemi mirë me reformën. Fakti që detyrohet SHBA-ja, të ndërhyjë në mënyrë të ashpër në një vend si Shqipëria, për shkak se është mbështetës i reformës në drejtësi, nga influenca që duan ta kthejnë në mënyra të vjetra”, tha Salianji.
Sipas deputetit opozitar, kryeministri Rama ka bërë një gabim në strategjinë e tij për të diktuar garën për kreun e Prokurorisë së Posaçme, kur dha urdhrin që Ministria e Jashtme të postonte informacionin për nisjen e procedurave të zëvendësimit nga DASH për Yuri Kim.
“Fakti që dikush apo njëri prej prokurorëve, qeveria detyrohet të ndërhyjë për të kapur një institucion, duke bërë faulle dhe gabime si ai i Ministrisë së Jashtme. Rama hyri në mënyrë brutale në debatin e opinionit publik për përplasjen me ambasadoren. Kjo strukturë nuk ka funksionuar, kur debate orientohet tek drejtuesi. SHBA është përpjekur të krijojë një influencë të caktuar për ta bërë të pavarur. Fakti që ndërhyn në këtë mënyrë të fortë, tregon se qeveria ka kapur një pjesë të mirë të institucioneve. Votimi i kësaj reforme në mënyrë konsensuale, e votuan gjithë klasa politike, produkti i dalë nga kjo reformë… Të detyrohet ambasadorja Yuri Kim në një organ të pavarur dhe të mbajë ato qëndrime, nuk e di. Kjo është një reform e imponuar nga SHBA-ja. Produkti i dalë është i kontrolluar nga Edi Rama”, deklaroi ai në vijim të diskutimeve në “Open”.
