Athina u trondit mbrëmjen e djeshme nga një atentat gjakftohtë ne mes të një lokali në zonën e Nea Smyrni, ku u ekzekutuan dy shqiptarët e njohur në botën e jetës së natës në kryeqytetin grek, Kreshnik Çerçizaj dhe Armando Organja.
Teksa ekzekutori u zhduk në terrin e natës së rrugicave të Athinës, hetuesit e ELAS sipas medias greke Newsit.gr po hetojnë mundësinë që ekzekutimi i dyfishtë i ndodhur mbrëmjen e së dielës të lidhet me vrasjen e ndodhur pak ditë më parë në rrugën “Fadil Bodianku” në Tiranë, ku humbi jetën 49-vjeçari Edmond Papa.
Sipas Newsit, 41-vjeçari Kreshnik Çerçizaj, i cili ka marrë disa plumba në kokë, ka qenë në të kaluarën shqetësim i policisë, pasi ka qenë i dënuar për kontrabandë, drogë dhe grabitje.
Sakaq të premten u vra në një lokal Edmond Papa, pronar i hotelit “Blu Sky” në Sarandë. 49-vjeçari ka marrë disa plumba dhe është transportuar në spital, ku ka humbur jetën.
Por, rezulton se Papa ka qenë i dënuar në Greqi për trafik droge dhe dyshohet se nuk i ka shkëputur lidhjet me shtetin helen.
“Ka mundësi që viktimat të jenë anëtarë të së njëjtit rrjet droge dhe të jenë ekzekutuar nga bashkatdhetarët e tyre. Duhet theksuar se në Shqipëri ka shpërthyer një “luftë” mes karteleve të drogës, pasi është zhdukur një ngarkesë prej 700 kilogram kanabis, ngarkesë për të cilën ka qenë përgjegjës biznesmeni i vrarë në Tiranë”, shkruan media greke.
