Emisioni “Piranjat” ka publikuar mbrëmjen e sotme një skandal që lidhet me ministren për Evropën dhe Punët e Jashtme, Olta Xhaçka.
Ministrja është kapur “mat” teksa ka vendosur në shërbim të familjarëve të saj një automjet në pronësi të dikasterit që ajo drejton.
Makina, që sipas verifikimeve i përket kësaj ministrie, është vënë plotësisht në shërbim të nënës së ministres, znj. Natasha Xhaçka.
Përveçse kjo makinë shtetërore me targë AA096PL e shoqëron çdo ditë në punë znj.Natasha Xhaçka, mjeti edhe parkohet me orë të tëra pranë zyrës noteriale në pronësi të saj.
Sa i përket Olta Xhaçkës, ajo ka qenë edhe më parë e akuzuar për përdorimin e mjeteve të shtetit shqiptar për llogari të familjarëve të saj.
Kujtojmë se në vitin 2020, kur drejtonte Ministrinë e Mbrojtjes, Xhaçka përdori helikopterin e Forcave të Armatosura për një udhëtim me qëllim transportimin e saj në Dibër, ku do të merrte pjesë në një miting elektoral.
Sakaq, Xhaçka pritet që në 18 janar 2023 të njohë fatin e mandatit të saj si deputete pasi Gjykata Kushtetuese do të shqyrtojë dy kërkesë-paditë e Partisë Demokratike që janë ngritur, pas kontatimit të shkeljes së detyrës pasi qeveria i “dhuroi” një plazh në Dhërmi kompanisë së bashkëshortit të saj Artan Gaçi, me statusin e investitorit strategjik.
