Skandali “KatarGate” në Parlamentin Europian mund t’i kushtojë shtrenjtë eurodeputetes greke Eva Kaili.
Nënkryetarja e shkarkuar e PE-së do të dalë të enjten para autoriteteve belge, të cilat do të vendosin nëse do ta caktojnë ose jo masën në paraburgim për përfshirjen në rrjetin e përfituesve të miliona eurove cash dhe dhuratave nga Katari, me qëllim lehtësimin e procedurave ligjore të BE ndaj shtetit të Gjirit Persik.
“Ekathemerini” raporton se nëse ndodh që Kaili të shpallet fajtore edhe në Greqi, dënimi i dhënë nga autoritetet gjyqësore në shtetin fqinj do të jetë shumë herë më i rëndë se në Belgjikë.
Në Bruksel dënimet për krimet për të cilat ajo akuzohet janë më të buta, duke filluar nga tre deri në maksimumi pesë vjet.
Ndërkohë në Athinë, Kaili po hetohet nga prokurorët dhe Autoriteti i Pastrimit të Parave.
Ata po përpiqen të konstatojnë nëse ajo ka sjellë para të padeklaruara nga jashtë dhe i ka investuar ato në pasuri të paluajtshme. Nëse dalin prova që vërtetojnë akuzat dhe eurodeputetja shpallet fajtore, Eva Kaili mund të përballet me një dënim prej 15 vitesh burg.
Sipas mediave greke fokusi i prokurorëve është tani “Elontech”. Kjo OJQ e themeluar në vitin 2017 udhëhiqet nga motra e saj mbi të cilën po zhvillohen kontrolle, veçanërisht në lidhje me flukset e parave.
Dyshohet se kjo OJQ mund të jetë përdorur si mjet për të tërhequr programe europiane me vlerë deri në 15 milionë euro.
