Xhuliano Skuka vazhdon të bëjë liderin e Partizanit dhe ndaj Kukësit me golin e tij, hipotekoi tri pikët e radhës dhe vajtjen me moralin e duhur në derbin me Tiranën.
Në një intervistë për “Panorama Sport” sulmuesi flet për rrezikun që skuadra e ka vënë veten në dy ndeshjet e fundit dhe pikat ku duhet të përmirësohet. Golashënuesi më i mirë i “demave” është gati për derbin. Ai e lë pezull të ardhmen, kur shprehet se do të shohë në janar.
Përse i komplikon kaq shumë Partizani gjërat në fund kur duket sikur e ka vënë ndeshjen në rrugën e duhur?
Nuk e di të të them të drejtën. Për mendimin tim mund të jetë edhe pak për mungesë eksperiencë, duke qenë se ekipi përbëhet më shumë nga çuna të rinj.
A jeni gati fizikisht dhe emocionalisht për derbin?
Po, sigurisht. Vetëm fjala derbi është ajo ta shton motivin dhe të bën të jesh gati. I gjithë ekipi mezi e pret këtë përballje. Është ndeshje si të gjitha të tjerat, për tri pikë, por që ka specifika të ndryshme, pasi Tirana ndryshon nga ekipet e tjera për shkak të historisë dhe rivalitetit.
Çfarë duhet të bëjë më shumë Partizani për t’u kthyer te fitoret në derbin ndaj Tiranës?
Thjesht të vazhdojmë ritmin që kemi pasur pas këtyre dy ndeshjeve. Pavarësisht se me Erzenin nuk morëm rezultatin e duhur, loja nuk ka munguar. Kemi pasur një ritëm shumë më të lartë në krahasim me ekipet e tjera dhe në rast se vazhdojmë kështu, jemi në rrugën e duhur.
A do të largoheshit në rast se vjen një ofertë e mirë në janar?
Unë nuk jam marrë fare me këtë çështje të them të drejtën. Po fokusohem te ndeshjet e Partizanit dhe në janar më pas do të shohim./Panorama Sport
