Akuariumi “Aqua Dom”, i cili ndodhet në hotelin “Radisson Blu” pranë Alexanderplatz, Berlin, ka shpërthyer dhe ka lënë dy persona të plagosur.
Me një gjatësi prej 14 metrash, “Aqua Dom” konsiderohej si akuariumi më i madh cilindrik në botë, i cili mbante më shumë se 1500 peshq të llojeve të ndryshme.
Policia shkoi menjëherë në vendngjarje dhe evakuoi disa banorë, pasi sasi të mëdha uji u derdhën në rrugë. Policia gjermane e ka ende të paqartë se çfarë e shkaktoi shpërthimin në akuarium, ndërkohë që një hetim ka nisur.
Në vitin 2020 akuariumi ishte rinovuar dhe kishte më shumë se 100 lloje të ndryshme peshqish, si dhe 1 milion litra ujë.
