Kryeministri i Kosovës, Albin Kurti ka komentuar ndalimin e Rada Trajkoviçit, këshilltares së ministrit Nenad Rashiç, nga policia serbe në kufi teksa ishte duke u kthyer në Kosovë.
Në një postim në Twitter, Kurti tha se një ndalim i tillë nga regjimi i Beogradit është për hakmarrje ndaj serbëve që respektojnë ligjin e Kosovës. Për më tepër, Kurti përmendi edhe problemet shëndetësore të Trajkoviçit.
“Ndalimi 10-orësh në kufi nga regjimi autokratik serb i Rada Trajkovic, këshilltare e ministrit kosovar Nenad Rashic dhe një diabetike, për herë të dytë këtë javë, është një shkelje e rëndë e të drejtave të njeriut dhe hakmarrje tipike ndaj serbëve që respektojnë ligjin e Kosovës”, ka shkruar Kurti.
Pas deklaratës së Kurtit vetë Trajkoviç e ka falënderuar atë për fjalët dhe mbështetjen e shprehur ndaj saj. Ndërkohë në postimin e tij ai ka përmendur edhe Përfaqësuesin e Lartë të BE-së, Josep Borrell dhe emisarin special, Miroslav Lajçak.
