Në darkën e fundvitit që qeveria organizon për nder të ambasadorëve që shërbejnë në selitë diplomatike të vendosura në Tiranë, kryeministri Edi Rama është ndalur të flasë për konfliktin e rindezur javën e fundit në Veri të Kosovës.
Teksa BE, SHBA dhe NATO kanë garantuar se nuk do të ketë konflikt midis Kosovës dhe Serbisë, përsa kohë në Veri situatën e menaxhon KFOR-i dhe ka bërë thirrje për ulje të gjakrave e heqjen e barrikadave, Rama dënoi kërkesën e mikut të tij Vuçciç për të dërguar ushtarë në 4 komunat me shumicë serbe.
Sipas kreu të qeverisë, kjo kërkesë e Serbisë drejtuar NATO-s për të dërguar trupa në Veri është po aq sureale, siç do të ishte sikur Kosova t’i kërkonte NATO-s të dërgonte ushtrinë shqiptare në Serbi.
“Kërkesa e Serbisë drejtuar NATO-s për të dërguar trupa në Veri të Kosovës, është aq sureale sikur Kosova t’i kërkonte NATO-s të dërgonte trupa shqiptare në Serbi. Kështu që më mirë të mësojmë, të mësojmë të jetojmë dhe jetojmë me njëri-tjetrin dhe të shërbejnë pikërisht si fantazma të të shkuarës”, tha Rama.
Ai nënvizoi se rikthimi i barrikadave duhet të marrë fund njëherë e përgjithmonë dhe palët të shtrohen në rrugën e dialogut për zgjidhjen e mosmarrëveshjeve.
“E di, të gjithë e dimë që rritja e tensioneve në Veri të Kosovës, jo vetëm që është e padobishme, por thellësisht shqetësuese. Është e pabesueshme që na duhet të merremi vazhdimisht me shfaqjen e barrikadave, prapakthime. Diskutimi nuk do të jetë mbi ligjin e Beogradit, por duhet të bazohet në 3 pika: ‘D0ialog, dialog, dialog’”, deklaroi shefi i qeverisë.
