Laçi nuk fal asgjë në shtëpi, me kurbinasit që triumfuan minimalisht 1-0 përballë Erzenit në ndeshjen e parë të javës së 14-të.
Një sfidë shumë e rëndësishme për të dyja ekipet, por vendasit u treguan më të mobilizuar për të marrë suksesin e plotë dhe për të siguruar fitoren e dytë radhazi.
Të besuarit e Gentian Mezanit kaluan në avantazh në fundin e pjesës së parë falë një penalltie të përkthyer në gol nga Ujka në minutën e 48-të.
Pjesa e dytë solli më shumë emocione, pasi kurbinasit kërkuan golin e sigurisë, ndërsa shijakasit kërkuan me ngulm të evitonin disfatën.
Vendasit shënuan me Shkurtajn, por për një prekje të topit me dorë goli u anulua, ndërsa Erzeni dominoi gjithçka në 15 minutat e fundit duke i shkuar pranë golit në disa momente.
Kurbinasit menduan vetëm për mbrojtjen dhe i dhuruan shumë hapësira kundërshtarit, me shijakasit që nuk kishin saktësinë e duhur përpara portës së Dajsinanit.
Në fund asgjë nuk ndryshoi dhe Laçi mori maksimumin, duke shkuan në kuotën e 20-të pikëve në vendin e 5-të, një pikë më pak se shijakasit të cilët qëndrojnë në vendin e 4-t me 20-të pikë.
Kjo ishte humbja e tretë për Erzenin në këtë sezon dhe e para pas 5 takimeve radhazi, ndërsa Laçi në krahun tjetër jo vetëm rikthehet në pjesën e sipërme të renditjes, por edhe i kthen reston shijakasve për atë disfatë në fazën e parë me të njëjtin rezultat.
