Drejtësia italianë ka vendosur të dënojë me 120 vite burg në total anëtarët e dy bandave shqiptare të drogës, të cilat kontrollonin zona të caktuara në Romë.
Mes të dënuarve ndodhen edhe krerët e dy bandave, Elvis Demçe dhe Ermal Arapaj. Demçe është emri më i njohur për drejtësinë, pasi në përgjimet telefonike të siguruara nga hetuesit italianë ai rezultonte të kishte zënë një vend të rëndësishëm në rrethin e mafias italiane.
“Unë jam Zoti” është shprehja e Demçes në një prej përgjimeve që pushtoi të gjithë titujt e mediave italiane.
Sipas vendimit të gjykatës së Romës, Demçe është dënuar me 18 vite burg, ndërsa Arapaj, i cili njihej ndryshe me nofkën “Ufo” do të qëndrojë 16 vite pas hekurave.
Dënimet për anëtarët e dy organizatave variojnë nga 4 vjet e 6 muaj në 9 vjet e 8 muaj burg.
Ajo çka mori vëmendjen e hetuesve mbi bandën e Elvis Demçes, është se ajo u krijua në vitin 2020 dhe pati një rritje të shpejtë. Në gusht 2020 ai tregtonte 100 kg hashash ndërsa tetorin e ardhshëm ishte në gjendje të tregtonte mbi 1 ton që i sillnin të ardhura deri në 4 milionë euro.
Mediat italiane e kanë pasur në “lupën” e tyre Elvis Demçen, për të cilin kanë raportuar se bashkëpunonte me Arben Zogun dhe Dorian Petokun, të cilët po ashtu ndodhen pas hekurave.
Demce, kur doli nga burgu në vitin 2020 kishte kontakte dhe lidhje te forta me organizatat kriminale në Romë, me ushtrinë marokene, autoritetet portuale të Gioia Tauro dhe trafikantë nga Ekuadori.
Ai nuk nguronte të shkruante në rrjetet sociale “Unë jam Zoti”, duke përdorur pseudonimet e tij, “Spartacus” ose “Perseo”, të cilave u lidh një kuptim i fortë simbolik.
Në mungesë të tij, kontrolli në sheshet e trafikut të drogës u mo nga Ermal Arapaj, drejtues i një organizate tjetër shumë “të respektuar”.
Kur Demçe ishte në burg për vrasjen e 30-vjeçarit Federico Di Meo, “Ufo” tentoi t’i fitonte terren duke kapur zonat e tij të shpërndarjes së drogës, në Velletri dhe Acilia.
Kjo solli përplasje mes dy bandave shqiptare, të cilët nisën përplasje me armë, tentativa për vrasje dhe dogjën makinat e njëri-tjetrit, duke marrë kështu vëmendje të shtuar nga policia.
Grupet kriminale që drejtoheshin nga Ermal Arapaj dhe Elvis Demçe janë arrestuar nga policia pas një aksioni ‘Blic’, të zhvilluar mëngjesin e 18 janarit. Në pranga ranë 27 persona, duke shmangur në këtë mënyrë disa vrasje të mundshme, për trafikun e drogës.
