Ambasadorja Yuri Kim, i ka dhënë sot një përgjigje zërave të ngritur së fundmi për largimin e saj nga Shqipëria, të cilat u përhapën pas një postimit në Tëitter të Ministrisë së Jashtme për nisjen e procedurave të zëvendësimit të saj nga ana e DASH pas mbarimit të mandatit.
Teksa zyrtarisht eksperienca e Kim në krye të selisë diplomatike të SHBA-ve në Tiranë merr fund më 20 dhjetor, ambasadorja duket se nuk ka ndërmend të largohet pasi këtë të martë teksa mori pjesë në konferencën “Konsolidimi i Këshillit të Lartë Gjyqësor”, tha se do të jetë edhe ca më gjatë në Shqipëri.
“Kam 3 vite në Shqipëri do jem këtu edhe për ca më gjatë. Ka një sfidë të madhe këtu! Ka histori këtu dhe duhet të ndjemë empati dhe respekt për historinë që ka kaluar ky vend. Ky është një vend i vogël të gjithë njohin gjithë të tjerët. Vendime për atë se kush do jetë në atë pozicion të caktuar, kreu i një institucioni apo një tjetri”, tha ambasadorja.
Nuk dihet nëse ky është një sinjal për shtyrjen e mandatit të Kim nga ana e Departamentit Amerikan të Shtetit, por padyshim është një mesazh i koduar në drejtim të kryeministrit Edi Rama, me të cilin është përfolur se ka një krisje të raporteve kohëve të fundit, që pas nisjes së “etheve” të garës për kreun e ri të SPAK.
Diplomatja amerikane u ndal edhe tek zbatimi i Reformës në Drejtësi, ku theksoi se gjyqtarët duhet të japin drejtësi dhe jo të kryejnë hakmarrje personale, ndërsa njëherësh bëri thirrje për krijimin sa më shpejt të Gjykatës së Lartë.
