Redon Xhixha është vrasësi i Tiranës dhe i skuadrave të mëdha. Këtë e tregoi edhe në Superkupën e Shqipërisë, teksa në fund të ndeshjes me një goditje mundi Vllazninë.
Redon Xhixha është lojtari që tani po shkëlqen te Tirana. Dhjetë gola në 12 ndeshje, gol në Superkupë dhe dy në Europë, por me një ritëm të jashtëzakonshëm. Përtej çdo bllokimi të mëparshëm, i sivjetshmi për Redon Xhixhën është sezoni më i mirë i tij. Shkëlqen kudo. Mjafton të kujtojmë se ka shënuar dy tripleta, me Laçin dhe Teutën dhe një dopietë me Partizanin. Gola të rëndë dhe çdokush do ta kishte zili, ku në të parin shënoi 14 gola dhe në të dytin pa u mbushur faza e dytë, ai ka tundur rrjetën 10 herë vetëm në kampionat.
Njeriu i fitoreve të mëdha Redon Xhixha. Shënuat një gol shumë të rëndë si në derbi?
Realisht goli i rëndë. Një gol që shyqyr zotit erdhi në momentin e duhur dhe me të ia dolëm që të fitonim ndeshjen dhe trofeun e parë për këtë sezon.
Gjithë këto javë keni vuajtur për të shënuar, një lloj ngërçi ju kishte ndaluar?
Normale. Unë jam sulmues dhe çdo ndeshje pres dhe dëshiroj të sulmoj gol. Tej të tjerave fati ishte me mua dhe unë ia dola që të shënoj golin që duhej dhe të mos shkonim në shtesë.
Patët dhe një kapje me fjalë gjatë ndeshjes me Patrikun. Çfarë ndodhi realisht?
Asgjë me rëndësi. Thjesht u nervozova pak me të që nuk pasoi në atë moment se isha me portën bosh. Tashmë ajo histori është mbyllur. Janë nerva loje, janë momente loje. Gjithçka ikën shpejt, sepse këto gjëra mbeten në fushë. Asgjë tjetër…
Orges Shehi ka frikë largimin tuaj. Para pak kohësh tha që nëse Tiranës i hiqet Xhixha, s’mbetet më skuadër?
Nuk di çfarë të them për këtë. Tirana nuk është Xhixha. Tirana është Tirana. Thjesht Xhixha është një nga 11 lojtarët e Tiranës. Bën maksimumin, gjithmonë siç bëjnë të gjithë në fushën e lojës. Edhe nëse heq Xhixhën nga ekipi, nuk është se do të ketë ndonjë ndryshim të madh në grup. Kjo sepse edhe ai që do të luajë në vendin tim do të bëjë maksimumin.
Ama Xhixha nuk mund të jetë kaq modest në këtë moment. Është vrasësi i kësaj skuadre?
Vrasësi(qesh). Thjesht unë shënoj gola, por vrasës nuk mund ta them, por e pranoj se stërvitem gjatë gjithë javës për të shënuar në portën e kundërshtarit dhe për të fituar takimin. Detyra është që të shënoj sa më shumë që të fitojmë.
Tani keni një tjetër detyrë. Të shënoni kundër Kastriotit në javën e parë të rikthimit?
Me shpresë të zotit po. Dua të shënoj, sepse kam disa javë që nuk kam tundur rrjetën në kampionat dhe besoj se do të rikthehem te goli.
/Panoramasport
