I janë dashur 24 orë kryeministrit Edi Rama për të marrë mundimin që të reagojë për ngjarjet e paprecedenta që po ndodhin në Kosovë, ku serbët po tentojnë destabilizimin e Veriut me metodën e tyre të vjetër, vendosjen e barrikadave.
Në fakt reagimi i Ramës erdhi vetëm pasi serbët e maskuar sulmuan një patrullë të EULEX-it, duke mos marrë aspak në konsideratë faktin se kanë plagosur me armë një efektiv të policisë së Kosovës.
Shefi i qeverisë zgjodhi të heshtë teksa Albin Kurti dhe Vjosa Osmani në mënyrën e tyre përpiqeshin të ulnin tensionet dhe t’i tregonin Aleksandër Vuçiç e Ana Bërnabiç se retorika e luftës dhe thirrjet për inkuadrimin e ushtrisë në Veri janë provokime, për të cilat Beogradi do marrë përgjigjen e merituar nga Prishtina.
Në kushtet e një situate të rënduar, minimalja që pritej nga kryeministri i Shqipërisë ishte një deklaratë serioze për t’i dalë në krah shtetit vlla, por Rama ka zgjedhur disa “cicërima” në Tëitter ku i kërkon Vuçiç-it t’i kthehet dialogut.
Gjithashtu kryeministri kërkon nga Beogradi që të ndërhyjë për të qetësuar serbët në veriun e Kosovës, ndërsa shprehet se dënon sulmet mbi EULEX-in.
“Sulmet mbi EULEX janë të dënueshme pa asnjë ekuivok ashtu siç është i dënueshëm çdo akt dhune ndaj policisë së Kosovës. Rishfaqja e barrikadave në Veri të Kosovës, bie ndesh me çdo ligj e çdo frymë dialogu e jo vetëm nuk zgjidh asgjë, po përkundrazi komplikon më tej çdo gjë!
Shtyrja e votimeve nga ana e Presidentes së Republikës së Kosovës është një sinjal kuptimplotë, të cilit autoritetet e larta të Beogradit duhet t’i përgjigjen me të njëjtën frymë dhe ndjenjë përgjegjësie, për moslejimin e përshkallëzimeve të mëtejshme të akteve destabilizuese!
Beogradi duhet të ushtrojë ndikimin e vet mbi serbët e Veriut të Kosovës, pa i justifikuar assesi veprimet e tyre cilatdoqofshin arsyet! Arsyet diskutohen nuk përdoren si armë kundër policisë e si barrikada kundër rendit ligjor. BE-ja duhet të thërrasë urgjent tryezën e dialogut”, shkruan Rama.
