Në 24 orët e fundit situata në Veri të Kosovës është përkeqësuar dhe tensionet kanë eskaluar, aq sa serbët që kanë pushtuar rrugët me barrikada dhe të maskuar kanë qëlluar me bomba molotov patrullat e EULEX-it dhe me armë mbi policinë e Kosovës.
Në një kohë që ndërkombëtarët me SHBA dhe BE kanë dënuar ashpër tensionet e provokuara nga serbët në katër komunat e banuara gjerësisht prej tyre dhe sjelljen e Beogradit zyrtar, ajo çka bie në sy është heshtja që ka pllakosur në Tiranë.
Përveç Pandeli Majkos që sot foli dhe e krahasoi skenarin serb në Mitrovicë si ai i Rusise në Donbasin e pushtuar të Ukrainës, nga mazhoranca askush tjetër nuk ka denjuar të dalë e të marrë në mbrojtje qeverinë dhe policinë e Kosovës, duke dënuar dhunën dhe agresivitetin e Beogradit.
Kryeministri Edi Rama, i cili është i kudondodhur në rrjetet sociale kur bëhet fjalë për postime që promovojnë punët e qeverisë dhe raportin e tij me ndërkombëtarët, ka zgjedhur të heshtë dhe të mos kërkojë llogari te ortaku i tij i “Ballkanit të Hapur”, Aleksandër Vuçiç për tensionin e shkaktuar prej bashkëkombësve të tij.
Ndërkohë, si për “të larë gojën” për situatën e krijuar ka reaguar sot vetëm me një postim në rrjetet sociale Ministria e Punëve të Jashtme.
Vetë ministrja Olta Xhaçka shkruan në Twitter se Shqipëria dënon ashpër sulmet ndaj EULEX-it dhe Policisë së Kosovës dhe njëjtë si partnerët SHBA dhe BE bën thirrje për heqjen e barrikadave.
“Shqipëria dënon ashpër sulmet ndaj EULEX-it dhe Policisë së Kosovës në veri të vendit. Ne i bashkohemi thirrjeve të partnerëve tanë ndërkombëtarë për heqjen e menjëhershme të barrikadave nga grupet serbe të Kosovës. Është e rëndësishme të rivendoset qetësia dhe sundimi i ligjit”, shkruan Xhaçka.
