Një masakër e vërtetë është ajo që ka ndodhur në Romë paraditen e sotme, teksa në Fidene një takim midis një grupi personash për të zgjidhur konfliktin e pronësisë ka përfunduar me tre gra të vrara dhe katër të plagosur.
Lagjia veriore e Romës është përgjakur në kulmin e një mosmarrëveshjeje, me një burrë që qëlloi disa herë mbi tre viktimat. Edhe disa prej katër personave që kanë mbetur të plagosur janë në gjendje të rëndë.
Autori është identifikuar si 57-vjeçari Claudio Campiti, i cili është arrestuar dhe ndodhet pas hekurave. Sipas autoriteteve ai vuan nga probleme të shëndetit mendor.
Sipas hetuesve të ngjarjes së rëndë dyshohet se ky grup personash është mblledhur për të diskutuar problemeve shumë të vjetra të bashkëpronësisë për menaxhimin e një Konsorciumi.
Ndërkohë një prej dëshmitarve në vendngjarja ka thënë se vrasësi bërtiti: “Do t’ju vras të gjithëve”, para se të kryente krimin.
“Ai hyri në dhomë, mbylli derën dhe bërtiti do t’ju vras të gjithëve dhe filloi të qëllonte“, deklaroi dëshmitari.
Sakaq, në Twitter reagoi kryebashkiaku i Romës, Roberto Gualtieri, i cili tha: “Episodi i dhunës që trondit qytetin tonë është shumë i rëndë. Tre jetë të humbura dhe të plagosur rëndë nga të shtënat gjatë një diskutimi për pronën. Jam në kontakt me prefektin dhe nesër do të marr pjesë në Komitet për rendin dhe sigurinë”.
