Partia Demokratike do të finalizojë sot procesin e Primareve, pas zhvillimit të raundit të dytë në 5 bashki, që nuk e kanë njohur ende kandidatin zyrtar për zgjedhjet lokale të 14 majit.
Zgjedhjet do të zhvillohen në Mat, Dibër, Fier, Mirditë dhe Librazhd. Në total janë 6 bashkitë që shkuan në balotazh, por gara në Fushë-Arrëz është shtyrë për një datë tjetër.
Procesi i votimit do të hapet ne orën 8:00 e do të mbyllet në orën 18:00, por nëse edhe pas përfundimit të orarit zyrtar do të ketë ende anëtarë të PD që nuk kanë votuar, Qendrat e Votimit nuk do të mbyllen derisa të ketë votuar edhe personi i fundit.
Sakaq, vlen të theksojmë se nga 9 bashki që kaluan në balotazh, në 3 prej tyre ku përfshihet edhe bashkia e Tiranës, gjatë javës një nga rivalët u tërhoq duke konfirmuar besimin e votuesve për kandidatin që kishte marrë më shumë vota.
