Mjeku i njohur, Ilir Alimehmeti i ka rrëfyer të gjitha në lidhje me kandidimin e tij në Primaret e Partisë Demokratike për bashkinë e Tiranës, në një intervistë në emisionin “Wake Up”.
Alimehmeti tregoi se si e mori vendimin që të ishte pjesë e kësaj gare dhe falënderoi të gjithë ata që e kanë votuar. Mjeku gjithashtu u shpreh se nuk e quan tërheqje, vendimin për të mos qenë pjesë e garës së 14 majit, ndërsa theksoi se do vijojë që të mbështesë plotësisht Belind Këlliçin.
“Kur sheh se shumë gjëra nuk shkojnë, duhet të bësh diçka. Vetë fjala bashki do të thotë se vjen nga bashkësia. Ta harrojmë që gjërat ndryshojnë duke qenë pasiv në shtëpi, duhet të çohesh e ta bësh vetë, kuptohet me mundësitë që ka gjithkush”, tha Alimehmeti.
Më tej ai zbuloi se si u bë pjesë e këtij procesi inovativ përsa i përket demokracisë së brendshme në forcat politike shqiptare dhe raportin që ka me bazën e Partisë Demokratike.
“Ishte një primare dhe gara tjetër është më 14 maj. Zgjati rreth 3 javë procesi i primareve. Të paktën në Tiranë. Ishte mundësi të kishte figura të reja si në Tiranë apo edhe në qytete të tjera. Ishte një proces i gjatë. Unë isha i propozuar nga struktura në masë të madhe. Të parat ishin strukturat. Mbledhjet bëhen të rregullta. Teksa tregohej se çfarë janë primaret, vjen edhe propozimi”, rrëfeu Alimehmeti.
I pyetur nëse janë zhgënjyer personat që e kanë votuar në lidhje me vendimin e tij për t’u tërhequr, mjeku i njohur u shpreh: “Një falënderim i madh që më mbështetën, që erdhën më votuan. 8600 vetë erdhën për të votuar atë ditë dhe 2900 më votuan mua”.
“Pavarësisht këtij numri që nuk është i vogël, 26 për qind e tyre pati këtë preferencë. Vihet re dëshira për ndryshim. Përtej këtij pragu, ka më shumë që duan ndryshim, për ndryshim për mirë. Nuk besoj se ka humbur besimi i demokratëve. U them mos u besoni sondazheve online, kërkohet një impenjim më i madh. E dyta, dy figurat e tjera janë politikanë të regjur, figura drejtuese. Po të mblidhni votat e tyre, diferenca mes tyre është e madhe. Ne ishim përballë një balotazhi matematikor, por jo politik”, shtoi ai.
I pyetur se sa mundësi reale ka Belind Këlliçi të fitojë Bashkinë e Tiranës, mjeku i njohur tha se nuk u beson sondazheve online por reagimit të qytetarëve në takimet me ta.
“Do e analizojmë këtë, jo vetëm nga sondazhet. Sondazhet online për zgjedhjet lokale nuk janë ndonjë gjë të madhe, pasi aty votojnë nga qytete të ndryshme, edhe nga jashtë, por duhet të votojnë vetëm ata që jetojnë e votojnë në Tiranë. Sondazh sy më sy them unë, jo online”, nënvizoi Alimehmeti.
Më pas Ilir Alimehmeti u pyet në lidhje me ofertën që i bëri Këlliçi në momentin që ai u tërhoq nga gara, kur tha se në rast se fitonte Bashkinë e Tiranës, mjeku i njohur do të ishte Nënkryetar i bashkisë.
Mjeku u shpreh se është një ofertë bujare dhe fisnike, por ai i merr gjërat hap pas hapi.
“Jemi në një moment që mbaruan primaret. Nga pikëpamja personale nuk kam ndonjë lloj grishje për të pasur poste. Nuk është për një karrierë politike, por për ti shërbyer popullit. Nga ana politike dua që PD të fitojë zgjedhjet. Unë do e mbështes me mish, me gjak e me zemër që të fitojë Partia Demokratike”, vijoi Ilir Alimehmeti.
