Në konferencën e sotme për mediat, kryedemokrati Sali Berisha ka hedhur akuza të forta në drejtim të “kupolës” së Partisë Socialiste, duke renditur Taulant Ballën dhe Arben Ahmetajn si dy nga figurat e larta që po mbrohen nga SPAK me urdhër të kryeministrit Edi Rama.
Berisha shtroi pyetjen, se “ku shkoi prokurori që urdhëroi asgjësimin e telefonatave të implikimit në vrasje të Taulant Ballës?”, duke iu referuar dëshmisë së Ardian Çapjas se kreu i Grupit Parlamentar të PS është i implikuar në vrasjen e avokatit Ravik Gurra.
“SPAK është i partisë. Nga SPAK projektohen rryma të partisë. Rryma njëri me tjetrin. Një goditje e morën me inceneratorët. Tani ka rryma kush të fajësohet apo jo. Janë bërë të gjitha në emër të partisë. Ku shkoi prokurori që urdhëroi asgjësimin e bisedave telefonike të implikimit në vrasje të Taulant Ballës? Është nga lart. Ça kujton se janë këta?! Janë ushtarë, ushtarë mjeranë! Ku shkoi? Mos u merrni me ta”, tha Berisha.
Lideri i opozitës u ndal gjatë te afera e inceneratorëve, duke deklaruar se Rama dhe ish-ministri i Financave, Arben Ahmetaj çuan paratë nga thesari i shtetit në qesen e Lefterit, duke iu referuar ish-ministrit të Mjedisit.
“Ku është përgjegjësia e Lefterit dhe ku është e të tjerëve. Lefteri ishte ministër, në buxhetin e ministrisë së tij nuk kishte një qindarkë për inceneratorët. Për informacion, ti nuk merr dot kurrë një projekt që s’e ke buxhetuar. Përgjegjësit kryesorë janë ata që çuan paratë nga thesari i shtetit në qesen e Lefterit. Këtë e bëjnë vetëm dy persona dhe askush në Shqipëri, të dy bashkë dhe asnjëherë vetëm. Këtë e bën Kryeministri plus ministri i Financave. Në qoftë se këta nuk bien dakord plotësisht asnjë qindarkë nuk lëviz në buxhet. Buxheti është ligj parlamenti”, deklaroi Berisha.
