Kryetari i PD-së, Sali Berisha u shpreh këtë të Enjte se një njeri mund të gjuhet, madje edhe vritet, por shtoi se kauza nuk vdes kurrë.
Deklaratën e bëri gjatë një fjalimi që mbajti në Kuvendin e FRPD-së, ndërsa risolli në vëmendje sulmin ndaj tij në protestën e 6 Dhjetorit.
“Edi Rama, ky frikacak, nxjerr një kriminel në rrugë dhe gjuan. Një njeri mund të gjuhet, mund të vritet, por kauza nuk vdes kurrë. Ne do e faktojmë shpejt Edi Rama se kauza jonë do triumfojë. Se Shqipërinë nuk ta japim kurrë, se lirinë nuk ta japim kurrë, se votën e lirë nuk ta japim kurrë! Ata që kanë luftuar pushtuesit në histori, i kanë luftuar me moton ja vdekje, ja liri, ne do i luftojmë me moton: jetën e japim, votën nuk ta falim. Mjerë ti që ke prekur votën tonë”, theksoi Berisha.
Ai shtoi se tani fillon faza e dytë e revolucionit.
“Ju mbyllni këtë Kuvend të mrekullueshëm, PD mbylli primaret. Fillon faza e dytë e revolucionit, përballja me këtë armik, me këtë pushtues që ushtron gjenocid mbi Shqipërinë dhe shqiptarët. Koha në fton: aksion, aksion dhe vetëm aksion. E keni të qartë se liria na fton: sakrificë, sakrificë dhe vetëm sakrificë. Unë jam i bindur se ju e keni të qartë, se çfarëdo të bëjmë ne për Shqipërinë, ajo bën 100 herë më shumë për ne, prandaj ne do i dalim zot asaj. Ju uroj suksese nga zemra këtij Kuvendi dhe pres me padurim të madh të dalim së bashku në sheshin e betejës në emër të lirive tona, të dinjitetit shqiptar”, tha Berisha.
Duke iu drejtuar të rinjve, kryedemokrati u tha se kanë të gjithë potencialin, energjinë, entuziazmin, guximin dhe forcën për të shpëtuar këtë vend.
Ai shtoi se Shqipëria nuk shpëtohet me lutje, e deklarata. “Shqipëria shpëtohet me revolucion”, tha Berisha.
Kryedemokrati u shpreh se “jemi gati të luftojmë çdo armik të Shqipërisë, çdo pushtues dhe çdo mafie te saj”.
