Ish-zyrtari i Policisë së Shtetit, Erzen Breçani ka zbuluar se pasi neutralizoi Gert Shehun që goditi Sali Berishën në protestën e djeshme, ka marrë një porosi nga kreu i Partisë Demokratike përmes truprojës së tij.
Ai rrëfeu në emisionin “Now” se vetë Sali Berisha dhe Ilir Meta kanë ndërhyrë që Gert Shehu të mos goditej më tej nga turma.
Breçani tregoi se pasi kishte ndërhyrë për ta nxjerrë agresorin në trotuar në mënyrë që ta largonte nga turma e irrituar, vetë truproja e Berishës i kishte thënë se kreu i PD kërkonte që 31-vjeçari të dorëzohej në polici.
“Sali Berisha, pasi e kemi nxjerrë në trotuar nga turma, ka ardhur truproja i tij dhe ka thënë që doktori ka porositur që duhet ta dorëzojmë në polici dhe të mos preket më me dorë. Kam qenë duke ecur dhe duke biseduar me të në trotuar. U jam mirënjohës që mu bindën”, tha Breçani.
