Një histori e denjë për skenar filmi është ajo që ka ndodhur me një fluturim të linjës “Pegasus Airlines”, me avionin që u nis nga Maroku për të shkuar në Turqi dhe u ul në aeroportin “El Prat” të Barcelonës, pasi një grua pretendoi se do të lindte.
Sipas policisë spanjolle 28 persona shfrytëzuan uljen emergjente për t’u arratisur nga avioni dhe autoritetet janë vënë në kërkim të tyre, pasi gruaja shtatzënë rrëfeu se po shtirej sikur ishte gati të lindte.
Autoritetet thonë se sapo avioni u ul grupi prej 28 personash doli dhe “u përpoq të ikte”, por policia arriti të ndalojë gjysmën e grupit.
Por 14 nga emigrantët shpëtuan nga arrestimi dhe mbeten në kërkim.
Gruaja, për të cilën mjekët më vonë zbuluan se ishte shtatzënë, por nuk do të lindte, u arrestua me dyshimin për shkelje publike.
Autoritetet spanjolle thanë se pesë nga personat që u kapën ranë dakord të ktheheshin në avion. Sipas autoriteteve, pritet që së bashku me gruan që dyshohet se ka falsifikuar lindjen, të hipin në një tjetër fluturim të ‘Pegasus’ për në Marok edhe pjesa tjetër e personave që u ndaluan.
Një total prej 228 pasagjerësh kishin qenë në avion, i cili përfundimisht u ul në Stamboll në orën 13:10 pas një vonese prej më shumë se tre orësh, sipas Flightradar.com.
Rasti në fjalë vjen pas një incidenti të ngjashëm më shumë se një vit më parë, në të cilin një grup pasagjerësh që fluturonin nga Kazablanca në Stamboll u larguan nga avioni i tyre në pistën e ishullit spanjoll të Mallorca pas një ulje emergjente nën një pretekst të rremë.
Nga 24 që zbritën, 12 prej tyre u arrestuan, ndërsa 12 të tjerë u arratisën.
