Një 16 vjeçar është plagosur rëndë pas aksidentit që pësoi në tentativën për t’i shpëtuar policisë. Ngjarja ka ndodhur në Selanik të Greqisë.
I riu ishte duke drejtuar një automjet dhe ka shkuar në një pikë karburanti për ta furnizuar. Ai nuk ka paguar për karburantin e marrë, duke detyruar punonjësit e karburantit të njoftojnë policinë.
Policia ndoqi të riun duke i bërë disa herë shenjë për të ndaluar, por pa rezultat pasi adoleshenti nuk i kushtoi rëndësi sinjaleve të policisë duke shtuar shpejtësinë.
16-vjeçari ka tentuar të aksidentojë një prej makinave të patrullës së policisë dhe kjo ka detyruar efektivët të kryejnë qitje me armë zjarri në drejtim të tij.
I riu ka humbur kontrollin e mjetit, është përplasur me një mur dhe ka ndaluar. Ai është dërguar në spital për ndihmë mjekësore pasi ka marrë plagë të rënda nga përplasja.
