Kryeministri i Shqipërisë, Edi Rama, ka inspektuar punimet që po bëhen në kuadër të Samitit të Bashkimit Evropian dhe atij të Ballkanit Perëndimor, që mbahet nesër në Tiranë.
Ai bashkë me një grup pune kanë përshkruar në këmbë bulevardin duke iu drejtuar “Pallatit të Kongreseve” aty ku pritet të mbahen edhe konferencat e përbashkëta për shtyp të liderëve të BE, por dhe Ballkanit Perëndimor.
Mediat raportojnë se qarkullimi nuk është bllokuar, por lëvizja e mjeteve vijon normalisht. Policia e Shtetit ka njoftuar se masat kufizuese do të nisin që pasditen e sotme, në mënyrë që mos të këtë asnjë pengesë për perimetrin e sigurisë, vend në të cilin do mbahet dhe samiti i BE.
Por nga ana tjetër opozita e bashkuar ka parlajmëruar protestë para kryeministrisë, hapësirë kjo, e cila përkon me perimetrin e sigurisë.
Nuk dihet ende se si do të shkojnë zhvillimet, por palët duken shumë të vendosura në qëllimet e tyre. Kryetari i PD-së Sali Berisha është shprehur se me protestën e nesërme do t’i tregohet vendeve të BE-së se kjo qeveri është e korruptuar, por kryeministri Rama tha se ky veprim i opozitës është një njollë që i bëhet vendit.
