Sytë dhe vëmendja e Bashkimit Europian do të kthehen ditën e nesërme nga Tirana, me kryeqytetin shqiptar që do presë krerët e unionit në Samitin e përbashkët mes BE-së dhe vendeve të Ballkanit Perëndimor.
Për shkak të masave të marra për ruajtjen e rendit dhe sigurisë, me Tiranën që vendoset pothuajse në “shtetrrethim”, Aeroporti Ndërkombëtar i Tiranës është kujdesur të njoftojë të gjithë pasagjerët që do të udhëtojnë më 6 dhjetor që të paraqiten në Rinas 4 orë përpara fluturimit.
Aeroporti Ndërkombëtar i Tiranës sqaron pasagjerët në rrjetet sociale se prezenca e tyre nesër kërkohet në mënyrë që ata mos të rrezikojnë humbjen e fluturimit të tyre.
Sakaq, bllokimi i akseve rrugore do të nisë nga sot në mënyrë të pjesshme, ndërsa nesër Tirana do të ‘blindohet’ e gjitha, madje kalimi pranë perimetrit të sigurisë tek “Air Albania” do të bëhet vetëm me kartë identiteti.
