Ndryshe nga çfarë kishte deklaruar pak ditë më parë kur sulmoi Albin Kurtin pas emërimit si ministër të Nenad Rashiç duke e quajtur një “llum-terrorist” dhe u shpreh se asnjë politikan nga Serbia nuk do të shkelë më Tiranë për Samitin e 6 dhjetorit, Presidenti Aleksandër Vuçiç ka konfirmuar pasditen e sotme se do të marrë pjesë.
Vuçiç tha për mediat vendase se ka diskutuar me të gjithë bashkëpunëtorët dhe me kryeministren Ana Brnabiç, si dhe përfaqësues të disa shteteve për pjesëmarrjen e tij.
Për më tepër ai ka konfirmuar atë çka Edi Rama tha dje në konferencën për mediat para Samitit, që do të ishte katastrofike për Serbinë dhe vetë Vuçiç nëse nuk vinte në Tiranë.
“Nuk jam i sigurt, por do të ketë patjetër përfitime të shkosh në Tiranë. Sigurisht që do të kishte dëm nëse nuk shkoja në samitin BE-Ballkani Perëndimor. Ndoshta do të tregoja që kotësia ime është më e fortë dhe më e madhe, por sigurisht që do të ishte një dëm i madh për vendin, për tërheqjen e investimeve dhe gjithçka tjetër. Në këtë mënyrë, pavarësisht se tema është Ballkani Perëndimor dhe 20 prej tyre do të fillojnë të flasin për sanksionet ndaj Rusisë dhe problemin e Kosovës në mënyrë joadekuate. Ndoshta kolegët e mi kanë të drejtë kur thonë se është më mirë të dëgjosh të paktën një përgjigje sesa të mos dëgjosh asgjë. Pra, unë do të shkoj atje nesër”, tha Vuçiç.
