Prej orës 08:00 të mëngjesit të sotëm në të gjitha qendrat e votimit të përcaktuara nga Komisioni i Organizimit dhe Kontrollit të Operacioneve Elektorale pranë Partisë Demokratike (KOKOE) janë duke u zhvilluar votimet për proesin e Primareve.
Vëmendja më e madhe është përqëndruar në Tiranë, aty kun ë selinë qendrore kanë votuar kandidatët më në zë të garës së brendshme për bashkinë e kryeqytetit, nga ku do të dalë edhe emri që do të sfidojë Erion Veliajn më 14 Maj.
Pas dy rivalëve të tij kryesorë, Ilir Alimehmeti dhe Belind Këlliçi, në selinë blu ka votuar edhe ish-deputeti Gert Bogdani.
Në fjalën e tij për mediat, Bogdani tha se nga Tirana do nisë ndryshimi që do vijojë në të gjithë Shqipërinë.
Ashtu si dhe kandidatët e tjerë, edhe Bogdani i ftoi demokratët të dalin në votim për të zgjedhur kandidatin që duan.
“Kjo është ditë e rëndësishme për PD-në dhe jo vetëm. Kjo është ditë e rëndësishme për demokracinë në vend, pasi për herë të parë baza voton për ata që duan të drejtojnë qytetet. Kjo është ditë e rëndësishme për këtë simbolikë. Por ajo që është më e rëndësishme është 14 maji. Pra, demokratët votojnë për kandidatin, për atë që mund të sjellë ndryshimin në Tiranë, për të sjellë më pas ndryshimin në mbarë Shqipërinë. Unë ftoj çdo demokrat dhe simpatizant të vijë dhe të ushtrojë të drejtën e votës për të sjellë ndryshimin në Tiranë dhe më pas në të gjithë Shqipërinë”, tha Bogdani.
