Personi në foton kryesore është Mario Muka, 42-vjeçari i cili u vra me armë zjarri mbrëmjen e së Hënës, në qytetin Krefeld të Gjermanisë.
Sipas raportimeve të mediave gjermane, Muka u qëllua 3 herë me armë zjarri në kokë nga një person ende i paidentifikuar, i cili u largua me shpejtësi nga vendngjarja dhe dëshmitarët okularë e panë që të shoqërohej dhe nga një person i dytë.
Ngjarja e rëndë ndodhi mbrëmjen e së hënës në qytezën e Krefeld, me dëshmitarët që deklaruan se dëgjuan disa të shtëna rreth orës 19:50 dhe panë dy burra duke ikur në errësirë.
Shqiptari raportohet se ishte i njohur për policinë për grabitje dhe trafik droge. Megjithatë sipas mediave gjermane ai nuk ishte një “lojtar i madh” në këtë biznes, por një tregtar i vogël që kishte konsumuar edhe vetë lëndë narkotike.
Ndërkohë, Muka rezulton të jetë pronar i një karburanti në “Katër Rrugët” e Shijakut.
Ai kishte emigruar drejt Gjermanisë në vitin 2018.
Dy të arrestuar
Mbrëmjen e djeshme, mediat gjermane raportuan për dy persona të arrestuar lidhur me krimin.
Bëhet me dije se në pranga u vunë një 20 dhe një 26-vjeçar, identiteti i të cilëve nuk bëhet me dije nga autoritete gjermane, por raportohet se janë të dy shqiptarë. Njëri prej tyre rezulton në kërkim policor.
Ndërkaq, autopsia e viktimës ka zbuluar se shkak i vdekjes është goditja me armë zjarri me kokë.
Policia gjithashtu ka sekuestruar një makinë të parkuar pranë vendit të krimit. “Ne dyshojmë se makina ka lidhje me krimin”, tha një zëdhënës i policisë.
