Një trafikant i dyshuar i qenieve njerëzore që ka lidhje me mbytjen masive të emigrantëve që dështuan për të realizuar kalimin me gomone për në Kanalin anglez një vit më parë, është arrestuar sot.
32-vjeccari Harem Ahmed Abwbaker u arrestua në një banesë në Cheltenham, Gloucestershire, nga hetuesit nga Agjencia Kombëtare e Krimit (NCA).
Ai është i dyshuari i parë që arrestohet në Mbretërinë e Bashkuar pasi 31 emigrantë u mbytën kur varka e tyre u ça dhe u fundos në errësirë dy orë pasi ishin larguar nga brigjet e Francës.
Telefonatat për ndihmë çuan asokohe në konfuzion nëse gomonia ishte në ujërat franceze apo britanike, duke krijuar një debat të madh për autoritetet që do të mbanin përsipër fajin për tragjedinë për mungesën e reagimit në kohë.
Gjithsej 27 trupa u gjetën të nesërmen, dy persona mbijetuan dhe katër janë ende të zhdukur.
Menjëherë pas tragjedisë, autoritetet franceze arrestuan pesë të dyshuar dhe ndaluan 15 të tjerë në qershor të këtij viti.
Sakaq, Abwbaker do të paraqitet në gjykatën e magjistraturës në Westminster të mërkurën në mëngjes për një seancë dëgjimore, teksa mbi të rëndon një urdhër ekstradimi nga Franca.
“Ky është një arrestim i rëndësishëm dhe vjen si pjesë e hetimeve të gjera për ngjarjet që çuan në këto vdekje tragjike në Kanal”, tha zëvendësdrejtori i NCA, Craig Turner.
