Një ngjarje e rëndë është shënuar në një komisariat policie në Itali, ku një shtetas senegalez ka tentuar që të përdhunojë një grua shqiptare.
Sipas mediave vendase ngjarja ndodhi në dhomën e pritjes të zyrës së emigracionit të komisariatit të Pistoias, ku burri me origjinë senegaleze ngacmoi dhe sulmoi gruan dhe më pa u arrestua.
Fillimisht ai i kërkoi me këmbëngulje që ajo ta ndiqte në banjë dhe më pas kur shqiptarja refuzoi, burri e kapi me forcë nga kyçi i dorës duke u përpjekur ta tërhiqte drejt banjës.
Policët e zyrës së emigracionit janë vënë në dijeni të asaj që po ndodhte dhe kanë ndërhyrë menjëherë në mbrojtje të viktimës, duke arritur me shumë vështirësi ta shkëpusnin nga duart e senegalezit.
Ai akuzohet për sulm të rëndë, tentativë për sulm seksual dhe kundërshtim ndaj zyrtarit publik.
Sakaq, një prej policëve që ndërhyri iu desh t’i drejtohej spitalit për traumë në shpatull dhe dorën e majtë pas përplasjes fizike me agresorin.
