Detaje të reja zbardhen nga të shtënat e ndodhur këtë pasdite në Laç. Policia, përmes një njoftimi zyrtar, bëri me dije se ngjarja ka ndodhur në degën lokale të PD-së, pasi një debati mes Kastriot Markut, nënkryetar i degës dhe 53-vjecarit Van Rica, anëtar partie.
Personi që qëlloi me armë është shpallur në kërkim. “Specialistët për Hetimin e Krimeve në Komisariatin e Policisë Kurbin shpallën në kërkim shtetasin Van Rica, 53 vjeç, për veprat penale ‘Mbajtja pa leje e armëve, armëve shpërthyese dhe municionit’, ‘Kanosja’ dhe ‘Prishja e qetësisë publike’”, njoftoi policia.
Ngjarja
Sipas të njëjtave burime, shpallja në kërkim e tij u bë pasi rreth orës 17:30, Policia e Kurbinit ka marrë njoftim për një konflikt, gjatë së cilit një shtetas kishte qëlluar me armë zjarri.
Pas marrjes së njoftimit, efektivët e Policisë kanë shkuar në adresën e dhënë, ku ka rezultuar se: Dega lokale e një subjekti politik, në Kurbin po zhvillonte një mbledhje dhe gjatë saj, ka pasur një debat mes shtetasve Kastriot Marku (Prenga) dhe një anëtari Van Rica, mbështetës i një kandidati tjetër primar, nga ky subjekt politik për Kurbinin.
Në debat e sipër, Van Rica ka qëlluar me armë zjarri në korridor dhe është larguar menjëherë nga ambientet e degës së subjektit politik.
Shërbimet e Policisë kanë shoqëruar disa shtetas të pranishëm gjatë konfliktit, për t’i marrë në pyetje.
Gjithashtu, në cilësinë e provës materiale është sekuestruar arma e zjarrit tip pistoletë me të cilën Rica, tashmë i shpallur në kërkim, dyshohet se ka qëlluar.
Materialet procedurale iu referuan Prokurorisë së Rrethit Gjyqësor Kurbin për veprime të mëtejshme, mbyllet njoftimi i bluve.
