Presidenti i Republikës, Bajram Begaj priti sot autoritete të larta të shtetit, përfaqësues të trupit diplomatik dhe përfaqësues të forcave politike, fesë, kulturës, artit dhe medias.
Pritja ishte në kuadër të 110-vjetorit të Pavarësisë së vendit tonë ndërsa kreu i shtetit foli për të kontribuar për Shqipërinë e gjeneratës tjetër.
“Si President i Republikës, në interes të kombit dhe të ardhmes tonë, ftoj të gjithë aktorët politikë e institucionalë, shoqëri civile e media, çdo shqiptar, që t’i përkushtohemi vizionit për Shqipërinë e gjeneratës tjetër, vendin e projektuar për të qenë anëtare në Bashkimin Evropian”, tha ai.
Ndërkohë, në këtë takim është vënë re edhe prania e disa figurave politike si Lulzim Basha, Lindita Nikolla, Monika Kryemadhi, etj. E pranishme ishte dhe ambasadorja amerikane Yuri Kim.
Basha dhe Kim janë parë të afërm në këtë takim, ndërsa shkëmbejnë batuta dhe të qeshura me njëri-tjetrin.
Po ashtu, në pritje janë parë edhe deputetë të tjerë demokratë e socialistë, si dhe ish-kryeministri i Kosovës Ramush Haradinaj.
