Emigrantët shqiptarë vijojnë të mbeten temë e nxehtë në Britaninë e Madhe edhe pse vala e azilkërkuesve që kalonin Kanalin me gomone është ndërprerë për shkak të ftohtit të dimrit.
Ministrja e Brendshme Suella Braverman pasi i cilësoi “kriminelë” dhe “pushtues”, raportoi edhe në Komons për problemin me azilkërkuesit shqiptarë, por gjuha e përdorur prej politikanëve britanikë është kritikuar sot ashpër nga Amnesty International.
AI shkruan se në Mbretërinë e Bashkuar kanë shpërthyer mosmarrëveshjet dhe shkak për këtë u bë edhe një grup deputetësh konservatorë që i bënë thirrje kryeministrit Rishi Sunak të kthejë azilkërkuesit shqiptarë në vendin e tyre, duke mos kursyer ata personat që kanë deklaruar se janë viktima të trafikimit të qenieve njerëzore.
Ka qenë Steve Valdez-Symonds, drejtori i programit për të drejtat e refugjatëve dhe migrantëve të Amnesty International në Mbretërinë e Bashkuar, i cili në një intervistë të dhënë për The Guardian ka kritikuar David Davis dhe kolegët e tij konservatorë, duke thënë se “këtu ka shumë absurditet”.
“Pika fillestare është nëse qeveria juaj nuk dëshiron ose nuk është në gjendje të sigurojë mbrojtje nga persekutimi. Nuk përcakton se cilët duhet të jenë përndjekësit tuaj”, u shpreh ai.
Gjithashtu ai ka theksuar se ishte totalisht e gabuar deklarata se të gjitha viktimat e trafikimit mund të dërgoheshin në shtëpi të sigurt.
“Kthimi i dikujt nga ku është trafikuar ka të ngjarë t’i çojë përsëri në shfrytëzim mizor, përveç nëse ka ndonjë përmirësim të rëndësishëm në rrethanat e tyre në atë vend”, përfundoi ai.
