Avokati Genc Gjokutaj komentoi protestën e 6 dhjetorit dhe polemikën që lindi pasi Policia e Shtetit tha se nuk e jep lejen për zhvillimin e protestës brenda perimetrit të sigurisë që do të krijohet për samitin Bashkimi Europian-Ballkani Perëndimor.
Avokati Genc Gjokutaj është i mendimit se e drejta e tubimit është një e drejtë që shqiptarët e kanë fituar me shumë sakrifica e mund dhe s’mund të ndërpritet nga policia. Sipas tij, shteti nuk mund të ndalojë tubime paqësore të cilat nuk cënojnë sigurinë.
“Kam parë përgjigjen e policisë drejtuar organizatorëve të manifestimit që thotë në bazë të nenit 8 për tubimet ndalon zhvillimin e tubimit. Nga pikërpamja kushtetuese ky tubim nuk mund të ndalohet, pasi është manifestim si të tjerat, i njëjti format, organizatorët i janë drejtuar policisë për t’i njoftuar. Ndaloj thotë ai manifestimin. Nga organizatorët janë kryer të gjitha parametrat ligjorë, vendi, data, ora, objekti. Policia thotë se konsultuar dhe me partnerët europianë, kanë caktuar një perimetër sigurie. Perimetri nuk mund të ndalojë tubimin. Në çdo manifestim që kanë bërë subjekte politike gjithnjë ka pasur një perimetër, por ky perimetër nuk mund të quhet i cënuar nga manifestues paqësorë. Ligji thotë se kur manifestimi është pa armë, shteti nuk ka tagrin që ta ndalojë.”-tha Gjokutaj per Syri tv.
Genc Gjokutaj deklaroi se vendimi i Policisë së Shteti është i paligjshëm dhe i paekzekutueshëm pasi e drejta e tubimit është e drejtë natyrore e protestuesve.
“S’ka si të ndodhë. Pas kuintave shoh faktin që në shkresën e policisë përmendet që cenohet siguria publike e kombëtare, duan të kompromentojnë këtë manifestim proteste solidariteti me Europën, me një grup personash të inkriminuar se këto ditkan çfarë do të ndodhi.”-tha Gjokutaj.
