Paqëndrueshmëria e Kinës
Evropa po kalon një ndër periudhat më të vështira ekonomike, si pasojë e inflacionit të lartë shkaktuar nga lufta në Ukrainë. Ky fakt ka bërë që Kina të ridimensionojë edhe më shumë politikën e saj, kryesisht atë ekonomike për të diktuar deri diku lojën në këtë sektor përmes projekteve financiare.
Kina është një ndër shtete me potencial të madh ekonomik, por që brenda vetes ka shfaqur problematika të cilat shihen qartë, duke nisur edhe me vetë drejtimin e brendshëm të Partisë Komuniste Kineze që edhe drejton vendin për dekada.
Në muajin tetor të këtij viti, kohë kur u mbajt edhe kongresi i 20 i Partisë Komuniste Kineze u pa se ekzistonte ende luftë brenda llojit. Ish-Presidenti i Kinës në vitet 2003-2013, Hu Jintao është nxjerrë jashtë Kongresit. Jintao 79-vjeç, ishte ulur pranë Presidentit Xi Jinping, e pak minuta pas i tha diçka, u shoqërua jashtë ambienteve. Por paqëndrueshmëria e drejtuesve të këtij vendi shihet qartë edhe në ashpërsimin e qëndrimeve kërcënuese për luftë me Taivanin.
Teksa brenda PKK ka ende probleme, syinimi për të qënë prezente ne Evropë dhe Ballkanin Perëndimor vijon përmes dy platformave të njohura si “16+1” dhe “Rrugë dhe Brez” që Kina operon jashtë vendit me investime në infrastrukturë.
Ndërsa në vendin tonë pritet të zhvillohet një konferencë me temë “Kina dhe BP” ku pritet të synohet paraqitja e Kinës si një fuqi ekonomike, kulturore dhe ushtarake botërore. Për këtë arsye në vendin tonë erdhi edhe një i dërguar special i Pekinit për Evropën Jug Lindore, me mision rritjen e bashkëpunimit dhe investimeve kineze në Shqipëri.
Joshja e vendeve me ekonomi të dobët, apo me plan për të pasur zhvillim të shpejtë është parë si një “derë pa çelës” nga Kina për zbatuar “16+1” që në thelb është një kuadër iniciativash bilaterale dhe multilaterale të përqendruara kryesisht në tri fusha kryesore: tregti, investime dhe rrjete transporti.
“16+1” dhe “Rrugë dhe Brez”, janë dy iniciativa që kudo në botë kanë treguar se kanë qënë me qëllime politike dhe strategjike, duke mos dhënë impaktin ekonomik të ‘premtuar’ në vendet ku është aplikuar. Dështimet kanë qënë evidente në rang global, si në vendet afrikane apo edhe Sri Lanka, ashtu edhe rajonin tonë ku mund të përmendim Malin e Zi.
Situata përkeqësohet edhe më shumë nëse do flisnim për rastin e Lituanisë, e cila hapi një zyrë përfaqësuese të Tajvanit, veprim që mori përgjigje të ashpër nga Kina, e cila ndaloi çdo import nga Lituania dhe çdo tregëti me këtë vend, masa të cilat u zbatuan në mënyrë dispropocionale dhe informale. Bazuar në eksperiencën personale, Lituania vendosi të tërhiqej nga “16+1” e gjithashtu u bëri thirrje vendeve të BE të bënin të njëjtën gjë.
Bazuar në këto fakte, shtetet të cilat mund të preken nga projekte apo inciativa të tilla, duhet të kryejnë analiza të thella, dhe duke parë historikun e ngjarjeve duhet të jenë më të matur e të kenë kujdes në mënyrë që vendimmarrja të përputhet me realitetin dhe jo me imazhin apo narrativën që kërkon të paraqes shteti komunistë kinez.
