Debati i ashpër në Kuvend dhe bllokimi i foltores nga deputetët e Partisë Demokratike dhe Sali Berisha ka bërë që mazhoranca të bëjë një hap pas për t’i dhënë 10 minuta hapësirë kohore çdo deputeti për të folur për projektin e portit të Durrësit, ndërkohë që më parë u caktua 6 orë kohë në total.
Porti i Durrësit së bashku me Buxhetin 2023 janë dy pikat kryesore të rendit të ditës dhe Berisha ashtu siç kishte paralajmëruar e ka nisur me vrull “betejën për të mbrojtur pasurinë e shqiptarëve”.
Deputetët e opozitës nuk u dorëzuan dhe kërkuan me ngulm të drejtën për të folur, ndërsa kreu i grupit parlamentar të PS-së Taulant Balla kërkoi 5 minuta pushim për të marrë një vendim.
“Meqenëse kemi dëshirën të kemi më shumë kohë. ndërpriteni seancën, 5 minuta pushim të marrim një vendim”, tha Balla.
Pas diskutimit u mblodh Konferenca e Kryetarëve dhe vendosi t’u lërë në dispozicion deputetëve 10 minuta për të folur.
