Gjuha e ashpër dhe replikat kanë shënjuar nisjen e seancës së sotme parlamentare ku do të miratohet Buxheti 2023 dhe projekti i Portit të Durrësit
Akuza dhe kundërakuza të forta janë shkëmbyer mes palëve, duke përmendur edhe vrasje të bujshme si ajo e avokatit Ravik Gurra në Elbasan.
Kjo ka bërë që debati të degjenerojë edhe në fyerje edhe ofendime.
Ishte nënkryetari i Partisë së Lirisë, Petrit Vasili që u ndërpre gjatë fjalës së tij nga vendi në sallën e Kuvendit, nga kreu i Grupit Parlamentar të PS-së, Taulant Balla.
Në këtë moment Vasili që po shpjegonte rregulloren në bazë të së cilës deputetëve që s’janë pjesë e grupeve parlamentare u lejohet fjalë për 10 minuta, e humbi toruan dhe iu drejtua Ballës me fjalë ofenduese.
“Boll i gënjyem shqiptarët, neni 28 pika tre është konsumuar që kur e futet me procedurë të përshpejtuar. O skizofren, nuk flet fare për kohën e diskutimit. Na lerë ta lexojmë mos bëj si idiot… Po qetësohu mo“, tha Vasili.
Në krahun tjetër Balla nuk është kursyer aspak me ofendime duke i kërkuar të pushojë dhe cilësuar si “debil” nënkryetarin e PL.
Është dashur tërheqja e vëmendjes nga Lindita Nikolla që të qetësojë dy deputetët.
