“Klani Rama me klanin Basha”. Për kryetarin e Partisë Demokratike, Sali Berisha janë këto dy klane që kanë në dorë projektin e Portit të Durrësit dhe po rrëmbejnë pasurinë publike.
Akuzat në drejtim të kryeministrit Edi Rama dhe ish-kreut të PD, Lulzim Basha, lideri i opozitës i bëri sot jashtë godinës së Kuvendit ku nënvizoi se “kunati i Bashës ishte ‘pika e mjaltit’” në këtë pakt për të vjedhur 200 mijë metër katrorë truall.
“Ju e shihni sot, përfytyroni për një moment, kjo marrëveshje ishte për tragjedinë e Shqipërisë, marrëveshje opozitë-pozitë, por jo si formacione politike, por si persona hajdutë. Klani Rama dhe klani Basha, kjo është e faktuar. Ai që ishte, se ka njerëz që më thonë pse e thua, se e them për të vërtetën, se ai ishte administrator i Simfonisë, ishte administrator edhe i Ramës, edhe i Bashës. Mos të kujtojë kush se po bëj akuzë politike, por po them të vërtetën e hidhur. Ky njeri tha se dha dorëheqjen nga ndërmarrja e Bashës dhe jo nga “Simfonia”. Por pas një muaji rezultoi se ishte sërish te të dyja. Pra, kjo ishte pika e mjaltit. Kjo do ishte e tmerrshme, opozita e blerë me marrëveshjen mafioze të Portit të Durrësit”, deklaroi Berisha.
