Rreth 200 banorë ndodhen në fshatin Godvi në njësinë administrative Zerqan, të bashkisë Bulqizë. Në këtë fshat nuk ka asnjë qendër shëndetësore dhe banorët janë detyruar të sajojnë një godinë të vogël me kontributin e tyre dhe teqesë së Bllacës, për tu përdorur si qendër shëndetësore por larg kushteve të duhura për shërbime.
Ata kryejnë shërbime minimale mjekësore, nga një punonjëse që vjen vetëm njëherë në javë, pasi nuk kanë as mjek dhe infermier.
“Unë nuk kam bërë koronare të zemrës, kam nevojë të mat tensionin. Mjekë nuk vijnë.“, tha një banore.
“Populli ka kërkesa, këshillit i kemi thënë edhe këshilli ka bërë kërkesa mjaft, nuk ka as mjek as infermier këtu”, tha një banor.
“Më vëshitë s’ka më, unë jam me tension shumë të lartë“, tha një tjetër banore.
Nuk dihet ende nëse bashkia e Bulqizës është në dijeni të situatës, për të cilën banorët e fshatit bëjnë apel të zgjidhet sa më shpejt.
