Ambasadorja e SHBA-ve në Tiranë, Yuri Kim ka takuar ditën e djeshme Ministrin e Drejtësisë Ulsi Manja për të shqyrtuar progresin në zbatimin e reformës në drejtësi dhe rëndësinë e saj për aspiratat e Shqipërisë për integrimin në BE.
Nëpërmjet një postimi në faqen zyrtare të ambasadës amerikane në Tiranë, ambasadorja zbulon se në takimin me Manjën ajo theksoi sërish deklaratën që Presidenti amerikan, Joe Biden tha në qershor 2021.
Biden e identifikoi luftën kundër korrupsionit si një interes thelbësor të sigurisë kombëtare, sepse kërcënon sigurinë, barazinë ekonomike, progresin dhe demokracinë.
Takimi i paraprin pjesëmarrjes së Ministrit Manja në Konferencën e Njezetë Ndërkombëtare Kundër Korrupsionit (IAÇ) në Uashington, DC, 6-10 dhjetor.
Kujtojmë se ditën e djeshme, Kim la të nënkuptuar se edhe ajo vetë ka humbur besimin tek institucionet e reja të drejtësisë, pas më shumë se 6 vitesh nga miratimi i Reformës.
Në një mesazh për procesin e zgjedhjes së kreut të ri të Prokurorisë së Posaçme SPAK, ajo shprehu dyshimet, kritikat, por edhe ndërhyrjen brutale në një proces, i cili i është besuar njerëzve të drejtësisë së re.
“Tani që janë konfirmuar kandidatët për kreun e ardhshëm të SPAK-ut, është thelbësore që procesi të jetë transparent në mënyrë që shefi i ardhshëm (1) të zgjidhet në bazë të kualifikimeve dhe historikut dhe (2) të jetë i aftë dhe i vendosur për të intensifikuar luftën kundër korrupsionit, krimit i organizuar.
Procesi i përzgjedhjes duhet të jetë pa manipulime nga ata që kërkojnë të bllokojnë apo ndikojnë në drejtësi, nga ata që preferojnë mënyrat e vjetra dhe për rrjedhojë kundërshtojnë reformën në drejtësi. Taktika të tilla i përkasin një të shkuare që ka dëmtuar shumë. SPAK – si reforma në drejtësi – duhet të jetë e ardhmja e Shqipërisë”, shkroi Kim.
