Ish-ministri i Drejtësisë, Ylli Manjani foli për deklaratat e fundit të ambasadores Yuri Kim për SPAK, në emisionin “Now”, duke thënë se ajo “bën muhabete kot” dhe fjalët në ajër nuk kanë asnjë vlerë.
Sipas tij, nëse në SPAK, ka prokurorë që pranojnë urdhrat e politikës, atëherë problemi është shumë më madhor sesa thjesht me drejtuesin e institucionit.
“Joe Biden ka lënë gjithë konfliktet e botës dhe është duke u marrë me drejtuesin e SPAK-ut të Shqipërisë. Kjo është të qeshësh e të shqepesh brinjësh me thënë të vërtetën. Hajde tani se foli Yuri Kim dhe bëjmë emision,” – u shpreh Manjani.
Ish-ministri deklaroi se nëse ambasadorja di ndonjë prokuror që merr urdhra nga politika duhet ta thotë, ama me fjalë në ajër është e kotë.
Manjani shtoi se çdo prokuror i SPAK-ut i ka cilësitë për të qenë edhe drejtues.
