Inteligjenca Ushtarake izraelite ka indicie se zyrtarë në Iran po mendojnë të realizojnë një sulm gjatë zhvillimit të Kupës së Botës në Katar.
Alarmin e ka dhënë vetë kreu i Inteligjencës Ushtarake gjeneralmajor Aharon Haliva duke argumentuar se një sulm nga Teherani zyrtar po përgatitet, pasi regjimi islamik po përballet me presion në rritje brenda vendit nga protestat mbarëkombëtare.
“Po ju them se iranianët tani po mendojnë të sulmojnë edhe Kupën e Botës në Katar. E vetmja gjë që i pengon ata është se si do të reagoj Katari”, tha ai.
Duke folur në një konferencë të Institutit për Studime të Sigurisë Kombëtare (INSS) në Tel Aviv, ai tha se protestat që kanë përfshirë Iranin janë “të jashtëzakonshme” dhe po shndërrohen në një “rebelim civil”.
“Numri i të vdekurve, sulmet ndaj simboleve kombëtare, kjo është shumë shqetësuese për regjimin, veçanërisht e kombinuar me sanksionet, presionin ekzistues ndërkombëtar dhe situatën e vështirë ekonomike”, tha ai.
Protestat që u nxitën nga vdekja e Mahsa Amini pas arrestimit të saj nga policia e moralit në Teheran në shtator, kanë bërë që regjimi të për përgjigjet ashpër duke vrarë mbi 400 njerëz dhe arrestuar më shumë se 15,000 të tjerë.
“Ekziston një shqetësim i vërtetë brenda regjimit se ai rrezikon regjimin. Në këtë fazë, unë nuk shoh rrezik për regjimin…. por ndërsa presioni mbi Iranin rritet, përfshirë presionin e brendshëm, përgjigja iraniane është shumë më agresive, kështu që ne duhet të presim përgjigje shumë më agresive në rajon dhe në botë”, tha Haliva.
Duke i bërë jehonë komenteve të Haliva, ministri në largim i Mbrojtjes Benny Gantz paralajmëroi se Irani është i prirur të sulmojë Kupën e Botës në mënyrë që të shkaktojë destabilitet rajonal.
“Irani po kërkon të ruajë destabilitetin si një gjë konstante. Në një kohë kur bota rreth tij është e qëndrueshme dhe lulëzon, kjo është e kundërta e asaj që po ndodh brenda Iranit. Kupa e Botës ka të ngjarë të jetë një nga ato ngjarje në të cilat përpiqet të shkaktojë destabilitet”, tha Gantz.
