5 vite më parë, rrëshqitja e dherave në fshatin Terbaç në Elbasan la pa shtëpi një familje, e cila jeton në skamje. Për 11 muaj ata morën bonusin e qirasë, ndërsa më pas nuk e përfitoi më.
Zgjidhja e vetme ishte ngritja e një çadre, pasi familja Balliu duhej të kujdesej edhe për djalin invalid.
Kryefamiljarja Vule Balliu tregon vështirësitë me të cilat haset çdo ditë.
“Me qiri dhe kjo shtylla këtu. Për t’u ngrohur kemi përdorur këtë, është kjo, po dhe kjo do gaz po s’pate lekë çfarë do bëjmë. Ja me këtë. Vështirë shumë, na djegin sytë, çuni qan se i djegin sytë. Hyn i gjithë uji brenda se është shumë shi,” tha ajo.
Nga dëmtimi i banesës, familjes Balliu i takonin 1.4 milionë lekë dëmshpërblim. Këto para Xhemali Balliu nuk i mori kurrë, pasi kushti sipas tij ishte të gjente një sipërfaqe toke ku mund të ndërtonte banesën.
Në mungesë të ndihmës nga shteti, kjo familje që jeton në çadër kërkon ndihmë nga pushteti lokal.
/Euronews Albania/
