Ky mund të quhet një nga Botërorët më të çuditshëm në spektrin e pritshmërive te kombëtarja e strategut Hansi Flik, madje jo vetëm te tifozëria, por edhe në kontingjentin përbërës, marrë në konsideratë atë çka ata kanë prodhuar në historinë e Botërorëve.
Kjo është njëra anë e medaljes, pasi do të jetë fusha ajo që do të vendosë verdiktin final, nëse do të rezultojë brenda pritshmërive apo do të dhurojnë më shumë nga parashikimet e kryera. Gjithsesi timonieri Flik po i kryen detyrat deri në detaj dhe kjo mund të vërtetohet fare lehte nga zhvillimet e fundit të stafit drejtues.
Mats Batgreit i është shtuar skuadrës së Hansit. Misioni i tij është tejet specifik në teori, por më shumë sesa i vështirë në aspektin e konkretizimit. Aftësitë e përgatitësit danez kanë impresionuar 57-vjeçarin gjerman. Batgreit njihet si specialist i ndërtimit të skemave të përkryera në goditjet e lira, por jo vetëm.
Sipas “Tz” ai po trajnon imtësisht goditjen e këndit dhe ato të dënimit. Nga informacionet e raportuar bëhet e qartë se në rastin e këndoreve, Antoni Rydiger dhe Niklas Fylkry do të kenë aktorët kryesorë të rrezikut te porta kundërshtare.
Kjo është njëra nga skemat e Mats që praktikon në fazën përgatitore në Katar, përpara nisjes së kompeticionit më të rëndësishëm në rruzullin tokësor në arenën futbollistike, Kupa e Botës. Joshua Kimish do të mbulojë rolin e motorit në mesfushën e “Pancerave”.
27- vjeçari gjatë çdo faze përgatitore konsultohet me Batgreit mbi repertorin krijues të aksioneve dhe thyerjen e tyre pa hyrë në zonën e rreptësisë, për të goditur në katërkëndësh të palës mike. Leroi Sane nuk mund të mungonte në planet e specialistit danez.
Ai do të poziciohet si sulmues i fshehtë dhe në momentet kur të tijtë janë në kontroll të sferës do të luajë rolin e “karremit”, në krijimin e hapësirave për shokët e skuadrës dhe shfrytëzimin e shpejtësisë nga krahët.
