Në vazhdën e debatit të krijuar lidhur me numrin e lartë të emigrantëve shqiptarë që kalojnë kanalin e “La Manshit” me gomone për të kërkuar më pas azil, në Mbretërinë e Bashkuar jo të gjithë politikanët “ushqejnë” mendimin se ata janë “pushtues”.
Ndryshe nga gjuha raciste dhe retorika kriminale që Sekretarja e Brendshme Suella Braverman dhe dhjetëra deputetë konservatorë kanë përdorur për të veçuar shqiptar si stimulator të krizës në Kanal, deputeti i forcës qeverisëse në Britani, Daniel Kawczynski ka zgjedhur t’i mbrojë ata gjatë debateve në Westminster.
Ligjvënësi për zonën e Shrewsbury & Atcham iu drejtua kolegëve të tij në Parlament në seancën e 16 nëntorit duke iu treguar atyre për protestën e shqipotarëve në Londër, ku morën pjesë mbi 3500 persona, duke bërë thirrje që ministrja Braverman të kërkojë falje për epitetet e përdorura.
“Fëmijët e shqiptarëve po bullizohen në shkolla duke u përballur me abuzime të natyrës raciste. U takova me qytetarë shqiptarë në urën e Westminster javën e shkuar kur ata paqësisht po demonstronin duke mbajtur në duar flamuj shqiptarë e thonin: “Unë jam një punëtor ndërtimi, infermiere, doktor, jam mësues dhe ne jemi ne kontribuojmë në këtë vend, ndërsa media na portretizon si kriminelë””, tha Kawczynski, teksa nënvizoi se e ka vizituar vendin tonë dhe është i mahnitur prej peizashit dhe mikpritjes që i kanë ofruar.
“Unë jam i prekur nga ajo që pash dhe dëgjova në Westminster Breadge nga këta njerëz të cilët punojnë shumë”, shtoi ai.
Daniel’s Speech in the Westminster Hall Debate on the Western Balkans and the Council of Europe. He focuses on the Albanian diaspora living here and how they are currently being vilified. https://t.co/oIGg2jBMbH
— Daniel Kawczynski MP (@OfKawczynski) November 18, 2022
Deputeti konservator dënoi gjuhën e përdorur në media dhe komentet për këtë protest, duke u ndalur veçanërisht tek postimi i “babait” të Brexit, Nigel Farage në Twitter ku ofendonte shqiptarët sepse mbuluan me flamurin kombëtar statujën e Churchill.
“Demonstrata që unë pash është shumë ndryshe nga zhvillimet të cilat u pasqyruan në artikullin e Mail on Sunday, ku këta protestues portretizoheshin si njerëz të cilët krijuan dhunë. Kjo nuk është ajo që unë pash. Njerëz si zoti Nigel Farage përpiqen të lartësojnë këtë histeri anti-shqiptare në faqet e Mail on Sunday. Ata duhet të jetë shumë shumë të kujdesshëm në këtë që po bëjnë”, nënvizoi Kawczynski.
Një mesazh të drejtpërdrejtë ai e pati edhe për ministren e partisë së tij, Suela Braverman, duke thënë: “Ne të gjithë duam dhënien fund të modelit kriminal të grupeve kriminale por në asnjë mënyrë s’kemi si shembull marrim shqiptarët”.
“Sekretarja e punëve të brendshme duhet të fokusohet në detyrat e saj. Duhet të jetë e kujdesshme me gjuhën që ajo përdor”, nënvizoi ai.
