Shtatë kandidatët në garën e brendshme të Partisë Demokratike për bashkinë e Tiranës kanë prezantuar sot platformat e tyre para anëtarëve dhe simpatizanëve demokratë në Degën 1 dhe 2.
Gjatë shpalosjes së pikave kyçe të projektit të tyre për kryeqytetin, ata akuzuan kreybashkiakun Erion Veliaj për tjetërsimin që i ka bërë Tiranës dhe ndërtimet që mbijnë si kërpudha, me leje dhe pa të.
Në veçanti, Belind Këlliçi u ndal edhe te tentativa e Partisë Socialiste për të propaganduar përçarje në PD për shkak të primareve, duke përmendur drejtuesin e njërës prej tyre të lidhur me pushtetin për publikimin e lajmeve të rreme.
Këlliçi tha se e kundërta është e vërtetë, se sipas tij ka përplasje në Partinë Socialiste.
“Ka plasur te PS-ja sot. Karlo Bolino ka bërë disa Fake Neës qëpar, sikur ka ndodhur diçka midis nesh, por kjo nuk është e vërtetë. Apo jo Jul Deda? Me ndihmën e qytetarëve të Tiranës, unë jam i bindur se më 14 maj ne Bashkinë e Tiranës do ta fitojmë dhe kjo është e sigurt”, tha ai.
Më tej ai prezantoi platformën e tij për drejtimin e bashkisë, ku tha se qyteti ka nevojë të jetë proporcional dhe policentrik.
“Nëse fitoj do të kërkoj rihapjen e çështjeve të kryebashkiakut aktual. Plani im është shumë i shkurtër. Tirana ka nevojë të jetë policentrike. Tirana ka nevojë të jetë një qytet proporcional, ku ka vend edhe për makinat, edhe për biçikletat edhe për karrocat me fëmijë, etj. Përballë zyrës së Bashkisë është ngritur një kullë me 7 kate pa leje. I hyj kësaj gare me besim absolut se ne do ta fitojmë betejën më 14 maj”, u shpreh Këlliçi.
