Shkrimtarja Mimoza Ahmeti ka sqaruar sot lajmin që u përhap gjerësisht në media për akuzën që rëndonte ndaj saj për ndërtim pa leje, pasi nisi rikosntruksionin e banesës që ju dëmtua nga tërmeti.
Lakimin e emrit të saj në media për shkak të një dënimi për ndërtim pa leje me kryerjen e 40 orëve punë për interes publik, Ahmeti e komentoi në emisionin “Artkand”, duke thënë se ndërtimin e shtëpisë e kishte nisur me mirëbesim.
Ajo rrëfeu se kishte marrë lejen për të nga vetë kryebashkiaku i Tiranës, Erion Veliaj me një mesazh në WhatsApp.
“Bota bëhet shumë e bukur kur gjerat merren thjesht. Unë nuk i kam ndjekur këto portalet por dikush më tha se ishte bërë e madhe. Gjithçka ndodhi me mirëbesim, sepse unë kisha folur me erionin dhe ai ma kishte dhënë lejen me një shkrim në WhatsApp. Po mund të bësh sepse ma kishte shembur tërmeti dhe isha në pronë time. Gjithmonë doja që të ikja nga qyteti, të ndërtojë një atelje timen në Petrelë. Mirëpo mbase dhe ju shpreha dikujt që e njoh edhe ka ngjallur pas zili. Kjo nuk është hera e parë, unë për poezitë janë atakuar edhe në vitet ’90. Arti ka diçka që të jep një ekskluzivitet, kur mundohem ta shuaj ndonjëherë, dal pa krehur pa lyer dhe kur shihem në pasqyrë ndjej gravidancën e madhe të dashurisë dhe të besimit që kam marrë nga njerëzit. Shqiptarët kanë një fjalë të ‘Jeta është provë’“, tha Ahmeti.
Shkrimtarja është dënuar me kërkesë të Prokurorisë së Tiranës për ndërtim të paligjshëm.
Pa marrë parasysh faktin që banesa e poetes ishte dëmtuar nga tërmeti, gjykata urdhëroi që Mimoza Ahmeti të kryejë punë me interes publik për 40 orë.
Në bankën e të akuzuarve në Gjykatën e Tiranës, Ahmeti tha se shtëpia që kishte në Petrelë iu dëmtua nga tërmeti dhe se në këto kushte ajo u duhet të ndërtonte një banesë të re.
