Banorët e Divjakës janë bërë bashkë sërish për të protestuar kundër vendosjes së traut dhe aplikimit të tarifës që ka parashikuar Ministria e Turizmit për hyrjen në parkun kombëtar Divjakë-Karavasta.
Ata marshuan mëngjesin e sotëm nga sheshi para bashkisë drejt hyrjes së parkut, teksa disa furgonë policie i shoqëruan përgjatë ecjes së tyre me pankarta në duar.
Përkrah banorëve edhe në ditën e pestë të protestës është gjendur deputetja e Partisë Demokratike, Ilda Dhori, e cila iu drejtua me një mesazh të qartë ministres së Turizmit e Mjedisit, Mirela Kumbaro, duke i kërkuar të heq dorë nga vendimi për vendosjen e traut.
“Kemi qenë në komunikim të vazhdueshëm me ministren, por kur doja ta ngrija këtë kauzë në Kuvend, ministrja kishte ikur. S’ka asnjë koment apo argument për këtë shkelje, arbitraritet që po i bëhet këtyre njerëzve, të punës dhe që shohin vendin e tyre. Po i shkelet dinjiteti. Nuk flitet për tarifën, pasi nuk do të ketë as të ulët as të lartë, këtë ta dijë mirë zonja Kumbaro. Ne flasim për dinjitetin e qytetarëve, të cilët do të lëvizin lirisht në parkun e tyre”, u shpreh deputetja e PD.
Dhori tha se nuk do të lejohet të vendoset as trau dhe as të ketë tarifë, pasi bëhet fjalë për dinjitetin e qytetarëve që iu hiqet e drejta e shfrytëzimit të bukurive natyrore të parkut të Karavastasë.
“Jemi pro për këtë kauzë, kundër bllokimit të hyrjes në park dhe në plazhin e Divjakës. Është kauzë jo vetëm për Divjakën, por edhe për gjithë shqiptarët. Kjo është protestë pa ngjyrime politike, por për të gjithë shqiptarët”, tha Dhori.
Nga ana tjetër, ajo i kërkoi ministrit të Brendshëm Bledi Çuçi që efektivët e policisë të udhëzohen që të kujdesen për sigurinë e qytetarëve dhe jo për kabinën ku do të paguhet tarifa për të hyrë në parkun e Divjakës.
“Kam disa ditë, që unë komunikoj me Bledi Çuçin në rrjeteve sociale dhe mendoj se mund ta ketë marrë mesazhin. Policia që ai drejton ka qenë që në ditën e parë në mbrojtje të kësaj kabine. Bledi Çuçi një këshillë për vartësit tuaj që të jenë këtu për të ruajtur qytetaren dhe jo për të mbrojtur këtë që ka ardhur nga skrapi dhe atje do e ketë vendi”, tha ajo.
Ndërkohë, kreu i PD-së në Lushnje Eduart Sharka e vendosi theksin te dëmet në turizëm që aplikimi i tarifës do të sjellë.
“Këtë zonë e kanë ruajtur qytetarët e Divjakës. Ne do të jemi të parët. Nuk u themi qytetarëve shkoni ju përpara se ne vijmë mbrapa Dëmi është shumë më i madh për Parkun. Do mungojnë truistët do të jetë një zonë, ju kujtoj që këtyre djemve të rinj këtu ka pas një tra në Divjakë, ku bëhej kontrabandë cigaresh. Ndoshta kjo qeveri ka ndërmend të bëjë kontrabandë dhe jo gjë tjetër”, deklaroi ai.
I pyetur nga gazetarët lidhur me mungesën në protestë të deputetit të PS, Erion Braçe, i cili në rrjetet sociale ditën e djeshme sulmoi ashpër ministren Kumbaro dhe ARRSH duke i akuzuar për “lajthitje” me vendimin, Sharka tha: “Po të lexosh atë që thotë duhet të ishte bashkuar protestës. Pastaj në rast se i thotë për të rritur interesat politik është punë për atë”.
