Protesta e radhës e opozitës do të mbahet në datën 6 dhjetor, në ditën kur në Tiranë do të mbahet samiti mes BE dhe Ballkanit Perëndimor.
Sipas Berishës, ky është një rast historik që populli opozitar të ngrejë zërin e tij përpara përfaqësuesve më të lartë të demokracive evropiane, para të gjithë botës.
Berisha tha se këtë protestë liderët europiane duhet ta marrin si akt mirëseardhjeje, ndërsa për qeverinë Rama do të jetë një akt armiqësor.
“PD i mbetet të vazhdojë me gjithë fuqinë e saj e mbështetjen e popullit opozitar protestat e veta. Beteja e PD, është betejë për ekzistencën e demokracisë në Shqipëri.
Kur të gjitha institucionet kontrollohen e përfundojnë në duart e një partie, kjo në gjithë përcaktimet është diktaturë e një partie.
Protesta e 12 nëntorit duhet të vazhdojë me protesta të tjera dhe data 6 dhjetor mendoj unë është një datë, rast historik që populli opozitar të ngrejë zërin e tij përpara përfaqësuesve më të lartë të demokracive evropiane, para të gjithë botës. Pikërisht me këtë agjendë, betejë kundër monizmit dhe ekzistencën e pluralizmit.
Mbrojtjen e pasurisë më të madhe publike që kanë shqiptarët sot, portin e Durrësit. Po plaçkitet në mënyrën më të paimagjinueshme, po përvetësohet nga klani Rama.
Agjenda do të ketë edhe tema të tjera, por mendon se një popull i shndërruar, në një popull gomonesh, si asnjë komb tjetër në Europë.
Ne mirëpresim dhe u urojmë mirëseardhjen e kryetarëve të shteteve dhe qeverive të BE-së. Protesta e jonë synon para së gjithash të dëshmojë se në këtë vend, i cili po varfërohet, vidhet shkretohet çdo muaj e më shumë, aspiratat demokratike janë të forta.
Ftoj që ta marrim këtë protestë tonën si një akt mirëkëpritje ndaj tyre dhe padyshim një akt armiqësor, flagrant, të hapur ndaj Edi Ramës i cili me aferat e tij turpëron çdo komb, qytetar, njeri, lirinë, pluralizmin, të drejtat, transparencën dhe çdo gjë tjetër.
Unë këtë propozim kisha sot.”– tha Berisha.
Samiti i radhës i Bashkimit Evropian kushtuar Ballkanit Perëndimor do të mbahet në Tiranë më 6 dhjetor. Kjo u konfirmua nga presidenti i Këshillit Evropian, Charles Michel i cili shprehej: “Ne do të mbajmë samitin e ardhshëm të BE-së për Ballkanin Perëndimor në Tiranë, më 6 dhjetor, për të konfirmuar angazhimin tonë të shtuar në atë rajon. Ballkani Perëndimor është një prioritet kryesor për Bashkimin Evropian. BE-ja dhe Ballkani Perëndimor kanë nevojë për njëri-tjetrin”.
