Lejet e ndërtimit për kullat që mbijnë në Tiranë si kërpudhat pas shiut janë problemi kryesor që kandidati i PD për Primaret e bashkisë së kryeqytetit, Belind Këlliçi ka adresuar në daljet e tij publike.
Pak ditë më parë, Këlliçi bëri premtimin e fortë se nëse i besohet drejtimi i kryeqytetit do të auditojë çdo leje ndërtimi dhe çdo procedurë që Erion Veliaj ka dhënë sa kohë ka qenë në krye të Bashkisë së Tiranës.
“Unë i jap fjalën banorëve të Tiranës se do auditoj çdo leje ndërtimi dhe çdo procedurë që Erion Veliaj ka dhënë në krye të Bashkisë Tiranë! Do t’i numëroj çdo rikonstruksion fasade që ai ka bërë për të mashtruar qytetarët, me vlera disa herë më shtrenjtë se puna reale e kryer. Do t’i bëj evidencën e çdo liste punimesh të kryer për çdo metër asfalt elektoral të hedhur. Do t’i bëj evidencën e çdo paraje të dhënë OJF-ve të tij dhe atyre të kontrolluara prej tij, duke i maskuar pas aktiviteteve kulturore”, deklaronte Këlliçi pak ditë më parë.
Ndërkohë sot, me një postim në Facebook deputeti i PD ka zbuluar se vetëm në një vit e gjysmë Bashkia e Tiranës ka dhënë 2.8 milionë m2 leje ndërtimi.
Sipas Këlliçit kryeqyteti me Veliajn “timonier” nuk ka zhvillim por vetëm propagandë dhe betonizim.
“Për sa kohë mbjellja e një fidani bën lajm në të gjitha mediat, në Tiranë nuk ka gjelbërim, nuk ka zhvillim por vetëm propagandë dhe betonizim”, shkruan ai.
